【金手指】分析股票 而家最易(孫柏文)
孫柏文金手指
孫柏文指,當特朗普「承認問題」,就是康復的第一步時。
上周一,孫柏文寫咗篇題為「我開始感到樂觀」嘅文。講到話因外國政府,特別係美帝,終於明白隻武漢病毒有幾咁大鑊。所以當「承認問題」為康復嘅第一步時,開始可以踏上解救之路。
就喺篇文出街之後,美股連續四日狂升。一嘢就升咗兩成幾,返回書本話嘅「牛市」。作為一個97年已開始炒股票嘅人,真係可以同大家講,熊市反彈,永遠係最急。例子之多,如繁星般。今次亦不例外。如要建美股沽倉,依家就係最好時機。
當然,未買得唔等於唔做功課。而家就係做定功課最好之時,因為終極市底出現時,係好明顯,你我他都會知。點解嗰日仲有人沽或唔買?因佢哋被迫沽或冇錢。
個市跌到啲股價似反映公司會執,你只要買到啲最後唔執嘅股票,就會賺到喊。所以,呢啲動盪之時做功課係最易。因為首先你可以唔使睇歷史收入、支出,又唔使睇現金流。你點知隻病毒會點?睇嚟嘥氣。仲聽嗰啲仲講2019年業績點點點嘅分析同新聞,一樣白痴。
睇,就齋睇間公司嘅資產負債表。仲要資產一欄,齋睇現金有幾多(冇生產嘅廠值幾錢?冇人住嘅酒店呢?冇人搭嘅飛機?統統當零)。之後睇吓佢幾多負債,同最緊要最緊要,係啲負債幾時還。如果你當佢現金外資產係零,佢又有能力還債,不過股價都跌到抵買,呢啲就係一棍買完等退休之trade。
用芒格當年買中石油(857)嗰句,你唔使計佢究竟係重200磅定200.2磅。如果佢賣緊嘅價話佢係瘦骨仙,不過你知佢係個肥佬,就可大棍落注。
呢啲機會屬唔屬於你,就要睇你嗰刻有冇子彈了。小心買賣,祝君好運啊!
-----------------------------
【武漢肺炎】專頁 全民自救 抗疫資訊盡在《蘋果》
-----------------------
屬於香港人的移民攻略
立即登入
【全球樓行】 Dream House零距離