首富李嘉誠噚日喺倫敦同英國財政大臣白高敦食早餐，地點係唐寧街11號。李超人係以和記黃埔身份出席，席上仲有一批商界領袖。有錢佬同政府高官圍埋一堆，當然唔會係飲飲食食咁簡單啦，但係佢哋喺早餐會傾咗啲乜嘢，暫時就未有公布住，而和黃方面都唔肯透露任何嘢。
李超人此行一定唔單止為咗見白高敦咁簡單，佢同霍建寧等一眾和黃巨頭日前已經低調飛咗去英國，處理3G業務。和黃旗下3G旗艦嘅3集團日前宣布全球推出X-Series流動寬頻服務，賣點係，客戶可透過手機使用寬頻電話服務，節省大筆長途電話開支。