一次戲碼極差的賽事天，卻有一個估你唔到的賽事前夕，莫雷拉、貝湯美甚至近季失了支持的柏寶及杜利萊，竟公布下季齊齊唔玩。另外，下季有丁冠豪升正，若未能及時贏夠數的話，下季又會少了告達理及李易達，可以說九月新一季再開，騎練陣營都出現明顯改變。

對散戶來說，可能會說邊個騎練喺度都係咁賭，但對靠做數據分析來賭馬討飯吃的一群，一次過出現這麼多騎練大執位，恐防會擔心手上的電腦程式甚至人工智能，可否及時作出調節而不會影響慣常效能，尤其莫雷拉在不少相關統計中，一直處於領導地位。

提到用統計輔助選馬，近期五班賽不乏爆冷個案，由五月起計，隨便數數已有「永常喜」、「金碧光芒」、「大龍騰」以及剛周三（6日）「赤火神駒」和「駿協精英」等過10倍冷Win，但牠們往績甚至最近幾次表現尚非太差，甚至曾跑入三甲，那麼分頭從何來？原來上文提過的馬匹，悉數排10檔開外。

明日（10日）第二場五班泥地一哩，「大道至公」同程獨沽一味，今勻唞了近四個月揀首本戲蓄銳一擊，埋門試閘拍跳做齊，評分亦較季初泥地一哩奪亞時低了10分，但排13檔就嚇窒不少人，然而統計顯示，低班賽排檔差並無一票否決權，「大道至公」可博冷Win。

第三場「洪荒駿駒」剛戰跑1400米沿途走內疊跟前，以該賽日來說算不利跑線，跑入第五已有明顯進步，今次抽14檔早段盡搶可賺盡田草C欄利放形勢，出冷不奇。