曾演出港產片《桃色》嘅43歲韓國變性藝人河莉秀，自從去年同結婚10年嘅老公鄭英振離婚後，佢不時都喺Instagram晒相，但唔少網民就批評佢整容過度，搞到佢好唔開心，前晚更突然喺Ig上載黑白相話唔想再活下去，留言話：「喺世上活着，真係...因為我，所愛嘅人而聽到唔好嘅說話，因為愛我而被人指指點點、所有事都亂晒籠，我能為我所愛嘅人做咩呢？我嘅存在本身可能就係錯，閉上眼希望唔好再醒來。我自己感受到嘅污衊感及悲傷，直到依家仍好努力地生活、善良地生活，睇嚟呢個世界係唔可以靠努力同善良生活，一係到此為止喇...一係休息喇。」

河莉秀留言後，唔少網民都留言為佢打氣，又擔心佢會做儍事，經過咗兩晚後，河莉秀似乎平復咗心情，今日亦有更新Ig，上載咗一張寫有「I love you」嘅照片，並留言話令到咁多人擔心好對唔住，同時亦都多謝來自各方嘅打氣留言，同時表示會帶來更好嘅工作及生活，再次多謝大家嘅支持。

更多韓流，喺晒《娛果》
http://fb.com/appledailyent