搞完香港大學李嘉誠醫學院反冠名行動，又投身保護維港行動嘅郭家麒議員，因為兩個行動都熱潮減退，郭醫生惟有轉移陣地，近日以保護維港行動召集人嘅名義繼續出擊，搞緊個保衞天星碼頭大遊行，雖然又係另一場「力挽狂瀾於既倒」嘅騷，但郭家麒話呢場騷係要畀政府知道，市民係幾唔想拆個碼頭同鐘樓。
噚日佢風塵僕僕趕去新天星碼頭嗌咪同派傳單，呼籲市民呢個星期日中午12點喺舊天星碼頭集合，一齊遊行去政府總部，八方見啲途人都唔係太熱情接傳單，郭家麒嗌咪15分鐘左右就趕返去立法會。政府都已經拆緊個鐘樓啦，到底呢個星期日會有幾多人去遊行？郭家麒唔敢估計，只係話愈多愈好。