上周六晚皇家馬德里喺西甲作客2:1贏伊巴場波，皇馬隊長沙治奧拉莫斯喺73分鐘左右突然唔見咗人，離開球場接近五分鐘，當時場波仲喺踢成1:1，到底拉莫斯搞乜要立即離場解決？原來佢人有三急，但教練施丹當時已經換晒三個人，結果拉莫斯惟有急急腳衝入廁所解決，先繼續出嚟踢，施丹仲爆料話拉莫斯賴咗少少，真係正宗十萬火急呀！
皇馬呢場波贏得唔輕鬆，王牌基斯坦奴朗拿度（C朗）先喺上半場34分鐘開紀錄，亦係佢連續七場有波入；但易邊後五分鐘，伊巴就由守將拉米斯扳平。正當皇馬只係同對手踢成1:1之際，拉莫斯呢個時候先走嚟肚痛，搞到皇馬喺73分鐘起，被逼要打少一個近五分鐘。好在皇馬冇拉莫斯嗰陣都守得住，仲喺84分鐘憑C朗射入致勝球，梅開二度幫皇馬贏波，拉莫斯開完大，皇馬都開埋「大」。
賽後教練施丹就爆料話：「佢有啲整污糟咗自己，所以衝入廁所解決。」而主角拉莫斯亦喺ig解畫：「人有三急，入去再出返嚟，重新再嚟過，團隊入球，勝利！」而且，拉莫斯完場後仲同C朗攬頭攬頸，唔知嗰五分鐘時間內，佢趕唔趕得切辦大事後洗乾淨對手呢？如果唔係，C朗咪繼上周中歐聯俾丹尼爾嘅鼻涕襲擊後，又一次中招？

美斯又做老竇帶旺巴塞

講番場波啦，施丹就大讚C朗根本係外星人：「C朗就係與眾不同嘅球員，佢知道自己會成日入波，個人非常之咁積極，根本就係喺第二個星球嚟嘅，佢嘅數據已經說明一切。」
至於另一外星人美斯，同日西甲就冇代表巴塞隆拿作客馬拉加，不過喺場外一樣大演「帽子戲法」，原來佢去咗陪老婆生B，喺自己第三個仔Ciro出世後，美斯亦喺ig po相公佈，小Ciro嘅手仔握住老竇嘅手指（小圖），美斯仲話：「歡迎你Ciro！感謝上帝，一切順利，母子平安！我哋全家都好開心呀！」巴塞冇咗美斯，但都有蘇亞雷斯同菲臘比古天奴各入一球，作客2:0輕取榜尾嘅馬拉加，繼續領放。