特首林鄭月娥早前出席特首答問大會時，因為唔肯答自己母語係咪粵語，認為呢啲問題太無聊，遭民主派議員狂轟「三次不認母語」後，噚日朝早卻喺facebook出post，分享同粵劇名伶白雪仙賀壽時嘅合照，相中可見佢自己身穿透視喱士粉綠色旗袍登場。

fb帖文冇提粵劇

娥特喺帖文中話，記得自己舊年都上咗仙姐屋企同仙姐賀壽，眨吓眼就過咗一年。前晚佢就着穿透視喱士粉綠色旗袍出席仙姐喺酒店舉行嘅90歲生日晚宴，喺仙姐隔籬、宛如綠葉嘅娥特，形容場面既熱鬧又溫馨。娥特話喎，白雪仙女士係「藝壇瑰寶」，佢創新嘅精神、全情投入嘅工作態度，都係大家嘅學習榜樣，但全文查實都冇提過「粵劇」兩個字。
有網民睇到娥特呢個post，似乎仍對娥特早前就母語嘅回應耿耿於懷，留言問娥特：「佢（白雪仙）唱粵曲，林太你聽得明嗎？」亦有網民問娥特：「上面成篇嘢都是用香港話寫，請問妳（林鄭）的母語是什麼？」而最多留言都係叫娥特回應now記者噚日喺北京被公安打一事，結果去咗大灣區考察嘅娥特，噚日見傳媒時真係有回應事件，對事件表達遺憾而未有譴責，唔知網民收唔收貨？