【韓流】粉絲轟GD隻USB專輯勁甩色 YG親自解釋原因係…
BIGBANGUSB甩色GD
韓國天團BIGBANG嘅G-DRAGON(GD)上周推出專輯《權志龍》,不過噚日GD卻爆seed話專輯因為以USB形式而唔獲韓國音樂產業協會認定USB做音樂專輯,變相影響銷量及各台嘅專輯榜排名(相關新聞連結: http://bit.ly/2rwOWB4 )。
同時有日本粉絲就踢爆GD隻USB有甩色情況(相關新聞連結: http://bit.ly/2svEKb8 ),令到外界以為係USB品質有問題。而今日GD所屬嘅YG事務所就回應話今次USB為咗更好表達GD嘅DNA同母胎嘅概念,喺製作時已經故意令USB紅色部份甩色,但唔知原因嘅粉絲就喺網上指USB甩色係不良產品等帖文,YG強調話:「從我哋一公開USB專輯封面中就好容易睇到係有染色同埋有許多刮痕,我哋亦有事前解釋USB有可能甩色,亦曾講過製作呢個USB專輯嘅困難,因為要表達呢個母胎概念,須要喺USB染上紅色顏料及製作復古刮痕,最後更要以人手上色先可以營造這種效果。」
最後,YG指USB表面寫上《權志龍》,即GD嘅本名,呢個同GD出世時佢媽咪親自寫嘅字體一模一樣,同時GD亦都認為咁樣同母胎嘅概念好一致。
另外,《ELLE》時尚雜誌今日亦都公開GD影嘅封面照。