鄧健泓今日喺商台宣傳新歌《那年某日》同嚟緊4月底舉行嘅演唱會，佢話：「好耐未試過正式有唱片公司幫我發行，成件事好青春，好似當年成日開住收音機聽下有冇自己首歌嘅感覺，不過o依家冇咁瘋狂。」鄧健泓仲爆老婆石詠莉成日同公司同事打機：「打到凌晨3點幾，不過最緊要係大家開心，做音樂溝通到就最好。」

佢話自己心態唔同咗，唔期望新歌有咩成績：「多人支持同畀信心我就好，就係我老婆出碟成績咁，我就唔諗住出，自己都唔急，最緊要出碟嗰陣，唔好同佢撞期。」記者笑言佢同老婆合併出碟，鄧健泓笑謂：「隨Sukie S.新碟隨送鄧健泓新曲，好坎坷囉。」

提到演唱會，鄧健泓已經請咗方力申做嘉賓：「我哋同期同公司嘛，嗰時佢啲fans多到呀，不過我出《朋友二號》嗰時隻碟賣得勁過佢，16000隻，真係我最大成就感。」

另外，老婆石詠莉當然係演唱會嘉賓之一，鄧健泓話：「我請咗個好欣賞我作品嘅歌手上台，就係佢囉，不過佢好寸，成日話我啲歌詞老土。」

精選娛聞，喺晒《娛果》
http://fb.com/appledailyent