面對種種是非、偷食、分居傳聞，今日王浩信單拖到旺角出席品牌活動時，一次過回應。王浩信稱，同太太陳自瑤感情一啲問題都冇，亦都冇分居，而且鄰居可以做證。

王浩信又話，依家最重要係為囡囡物色小學，「我哋真係冇事。」

至於同蔡思貝被爆book房鎖埋門打邊爐事件，王浩信形容為「真係勁無奈」，「因為《踩過界》嗰邊都係成班人約出嚟一齊睇成果，成班人一齊嘅。(冇試過同蔡思貝兩個人喺VIP房？)梗係冇啦！完全冇呢啲咁嘅事，去親VIP房都係同屋企人。」

至於「三劍俠」與人夫一齊獵女之傳聞，王浩信話：「我依家冇朋友㗎喇，啲時間都花喺個女身上，o依家同太太最緊張都係個女，其他朋友都疏遠晒。」

問到有冇做過對唔住陳自瑤嘅事？王浩信直言：「完全冇囉！唯一一樣就係冇時間陪佢囉。」