吳業坤（坤哥）呢期人氣急升，今日佢喺將軍澳錄影節目，緋聞女友鄧佩儀就為佢送上蛋糕，賀坤哥橫掃各大頒獎禮，林盛斌（Bob）仲起哄要鄧佩儀獻吻賀緋聞男友，之後鄧佩儀作狀扮錫，坤哥竟然避開，事後佢就解釋話唔想令女方沾上污名先避開。

坤哥人氣爆燈，佢就話︰「我唔敢講自己紅，係大家對我多咗關心。」至於酬勞急增，佢就話︰「酬勞有微調，但唔係外傳咁幾級跳，係合理價。」被指加簽長約，佢亦澄清︰「奪獎前已經同TVB續約，唔係加簽！」

另外，坤哥父親指曾包二奶同佢媽媽離婚，坤哥表示母親冇因此唔開心，不過就語帶雙關話︰「我自己會盡量講說話唔傷害人，會考慮到人哋感受。」

此外，馬天佑今日去商台宣傳新歌《倒數三秒》，新歌MV搵嚟鄭秀文做女主角，至於下次佢就想同吳業坤合作。

馬天佑係咪會幫坤哥抹番乾副眼鏡？佢搞笑指眼鏡係坤哥特色：「形象上可以試吓再毒啲，加啲菇喺個頭度，或者佢變得好chok，可能都會令大家好驚喜。」

不過馬天佑就強調唔想被歸類係歌手：「我都係做藝術，未有計劃出碟，蝕錢？唔會嘅，會搵得番0架嘛。」