各位議員跟北大爺食飯，預了唔易落格，更要先填表格。這個表，咪當登記做選民咯，被迫登記多一次，建制派調亂地址種票都係咁上下。
噢，議員還要被告之，要穿「正服」。何謂正服？自古正邪不兩立，負負得正，正正反反，基本法N咁多條，無寫喎，由門口實Q去評定誰正誰邪嗎？穿喪服出席，即使成套黑西裝白恤衫，保安會不會學晒殺入馬屎埔村對付村民那批外判的一代宗師，對西裝友施以浮腰，撻生魚咁撻？
除了正服，還要遵守宴會中絕不離座祝酒的規定。心知肚明，個個等埋發叔離座，豈不甩轆「流會」！祝酒不必離座，除非離座者舉杯邀明月之後，即刻掟杯成一人！大叔望住一地碎玻璃，震驚啊，港獨真暴動，真係見到！這項規定，唔buy愈亂愈有利連任這種謬論，細心諗，擺明跟狼凸唱反調。
添美道的黐膠磚在兩度紅雨下被沖膠散咗，化成可笑的膠粒來迎接德江同志。向誰問責？大陸的L型經濟殺到，香港已進入「有人造假，無人需要負責」的黐L線狀況。