特首夫人梁唐青儀、馬浚偉同劉倩婷（Sandy）等，今日去到機場富豪酒店出席保良局「實現千歲願」安老籌募活動。以大使身份出席嘅馬仔就話自己兼任唔同機構嘅大使，所以言行都要特別小心，佢笑言自己唔可以行差踏錯，佢話：「我唔煙唔酒又冇夜生活，就連啲朋友都問我點解可以咁有規律，我唔覺得辛苦。人大咗，我o依家屋企嘅嘢多數都係天然，食嘅都會揀有機。」

提到大陸有好多不法份子製造假食物，馬仔都話接受唔到：「最近見到有假豉油，之前有假米，真係接受唔到，呢啲係食落肚嘅，唔好咁冇良心，幸好新聞被報道，希望大陸政府或者其他國家正視，應該要嚴懲，因為真係害人不淺。」而新年馬仔會喺香港過，因為就嚟開劇，要忙於背劇本，問到會唔會帶另一半見吓家長？馬仔就話：「見到就見，總之我會同啲親友過。」

至於Sandy嘅初生BB未夠一歲，新年都係留喺香港，仲計劃去主題樂園酒店過年，24號就係Sandy嘅31歲生日，佢就話會同老公李丞責二人世界，食燭光晚餐，佢話：「會靜靜雞，夜晚係成人活動時間。」會唔會乘機造人？Sandy就話：「下個生日先啦！我都有問老公追唔追個仔，佢就話自己有外父相，所以下一個都應該係女，男女都冇所謂，佢哋有伴就開心。」