荷李活影星尊尼狄普（JohnnyDepp）被30歲雙性戀妻子安芭赫德（AmberHeard）單方面申請離婚，仲上庭指控佢家暴，雙方各執一詞，呢個連續劇幾乎每日都有新進展，可謂搞到尊尼頭都大，不過現時片商仍對尊尼充滿信心，仲話有新戲會預埋佢。

有報道指導演BrettRatner將會拍攝一部關於國際貨幣基金組織(IMF)前總裁卡恩(DominiqueStrauss-Kahn)嘅故事，卡恩曾經捲入多宗醜聞，今次電影主要係講佢喺2011年曾被紐約一間酒店嘅女僱員控告佢性侵，令卡恩名譽盡毀，這宗案件最後庭外和解。

BrettRatner上月喺康城影展公佈拍攝呢部電影嘅計劃，消息就指佢已經斟尊尼擔任電影嘅要角，即使現時尊尼被家醜纏身，呢部戲仍希望搵尊尼演出，但對於尊尼嚟講，呢個題材係攞景定贈興？

同時，尊尼會將收藏多年嘅已故畫家Jean-MichelBasquiat多幅作品，拎出嚟拍賣。