球員生涯任職防守中場嘅曼城領隊哥迪奧拿，早前接受傳媒訪問表示：「費蘭甸奴比我強得多，若果我仲踢緊波，肯定無法搶走費蘭甸奴嘅位置。」觀乎費蘭甸奴今季嘅升級演出，哥帥呢番言論並沒有過譽之處。

今仗面對般尼茅夫，這類作客刻意防守嘅弱隊，盡快破關摧毀對手取分決心，可謂十分關鍵。不少球評家不斷盛讚奇雲迪布尼、大衛施華嘅傳送能力，其實巴西中場費蘭甸奴亦能交出致命一腳，今場為阿古路首個入球嘅美妙傳送，已經係費蘭甸奴今季嘅第3個助攻。

今季聯賽全部正選嘅費蘭甸奴，除咗係防守時成為兩名中堅嘅首道屏障、以佢固有嘅反搶能力阻截對手反擊外；今季費蘭甸奴嘅傳控能力和閱讀球賽視野均明顯提升，往往能保持球權，甚至立即作出精準長傳，直插對手心臟。

據英超官網嘅統計，費蘭甸奴已經由前年場均56.73腳傳球、去年場均68.13腳傳球、提升至今季場均78.32腳傳球，參與進攻及精準傳送明顯增多，費蘭甸奴目前係球隊嘅重要性，已成為咗曼城版嘅布斯基斯；對於哥帥黎講，可以雪藏藍月殺手皇阿古路，利用加比爾捷西斯代替；可以提前換走迪布尼，以根度簡代替。但費蘭甸奴嘅位置，似乎係無球員可以取代，故不難相信已經32歲嘅費蘭甸奴，最近亦傳出曼城急急希望同佢績約。

值得一提嘅係，中堅奧達文迪今季的傳送技術亦同樣升華，多次在中後場作出高波長傳，直接為前線球員製造埋門機會；更精彩的一腳於上半場中段，奧達文迪突然在離門約30碼施放冷箭，幾乎考起般茅門將比高域。

看來費蘭甸奴同奧達文迪，係哥迪奧拿嘅改造之下，已由純防守角色，漸漸變成傳射兼備嘅球員，可大大增添曼城嘅破關籌碼。

--------------------
狂賀！BFB系列推出5周年，精彩活動為您安排，立即登入速享專屬優惠！ http://bit.ly/2xrTKGM