成軍7年嘅韓國女團SISTAR本月初解散，4位成員分道揚鑣，當中27歲成員寶拉今日被爆料，指佢跟男團BIGSTAR嘅25歲成員Feeldog暗撻一年，報道指寶拉架車平時都係男友用，而上月韓國總統大選時，更有人目擊寶拉及Feeldog兩人一齊去投票站，之後手拖手離開。

爆出戀情後寶拉及Feeldog大方認戀，不過就指兩人發展咗半年，並唔係報道嘅一年。Feeldog嘅所屬事務所表示：「與本人確認後，Feeldog與寶拉已交往6個月，兩人係透過去年嘅綜藝節目《Hit the Stage》認識，互生好感而發展成戀人。」寶拉方面隨後亦指兩人感情很好地交往中。

同日，另一女團Girl's Day嘅31歲隊長素珍亦爆出姊弟戀，有報道指佢同26歲男歌手Eddy Kim去年合作綜藝真人騷《我也是導演：青春電影》後，慢慢發展成情侶，交往咗兩個月，不過素珍及Eddy Kim雙方火速否認戀情，指兩人只係好朋友。及後素珍及Eddy Kim方面又突然調轉立場認戀，表示一開始為咗體諒對方而否認，後來經過商討後決定公開。