投資者心水清、視野闊，會發現美股道指現水平距離歷史高點14198點，原來只是6.5%之遙，香港呢？恒指現水平卻仍距離31958點歷史高峯33%，真係唔爭氣，資金情願過大西洋炒美股，難怪港股成交奀過奀豬！
道指強唔好賴隻蘋果，因為隻蘋果甚至谷歌，都仍然未晉身道指成份股，而標普則仍然與歷史高位有11%落差。在美國上市的IBM、麥當勞（MCD）及迪士尼（DIS）都創了新高，不是成份股，卻持有必勝客、KFC的Yum！Brands（YUM）及BB奶粉股美贊臣（MJN），近期亦通通創新高，就算係指數內的可口可樂（KO）、強生（JNJ）及寶潔（PG），亦出現將要破頂創新高之勢。以上種種盡皆大家耳熟能詳的內需品牌，共通點是已成功開拓內地市場兼賺到笑。
反觀香港股市，近期個別本地成功得道創新高股份如恒安國際（1044）、旺旺（151）、統一（220），亦通通都離不開內需概念。不要拿百貨珠寶金飾與鐘錶股比較，大家都份屬內需，但後者風光過後近期有點傷，必需消費品與非必需消費品，在內需概念上分別好明顯，前者近期後發先至，不無理由。