已為人父嘅韓片《初戀築跡101》43歲男星嚴泰雄，去年8月捲入性侵案，令好爸爸、好老公形象受損，事後警方雖證實嚴泰雄無性侵嫌疑，但涉性交易罪成被判罰款。

嚴泰雄雖然曾被拍到同愛女享天倫，亦曾低調拍攝新作《Fork Lane》，但就未曾公開露面過。不過今日韓國就有消息指嚴泰雄日前出席「第21屆 Tallinn Black Nights Film Festival」，係佢捲入性醜聞後首度出席公開場合。

報道指嚴泰雄於當地時間上月30號，現身喺愛沙尼亞舉行嘅「第21屆 Tallinn Black Nights Film Festival」，因為由佢主演、今年7月喺韓國上映嘅《Fork Lane》有份入圍競爭部門，嚴泰雄就低調飛抵當地出席試映會、記者會等官方行程。嚴泰雄露面時心情似乎唔錯，都有笑笑口，未有顯得太憔悴，不過未知係咪壓力太大導致脫髮，頭髮似乎有啲稀疏。

報道又指嚴泰雄喺記者會上大談電影，表示電影都係講述當年韓國518光州民主運動，劇本引起佢嘅共鳴而決定演出，會上嚴泰雄未有提到捲入性醜聞嘅事。

更多韓流，喺晒《娛果》
http://fb.com/appledailyent