31歲嘅朗尼，同曼聯仲有兩年約，雖然紅魔鬼都唔多想留佢，但呢位英格蘭前鋒高達30萬鎊（約300萬港元）嘅周薪，真係幾嚇人，連母會愛華頓都怕怕，睇嚟只有中超球隊先出得起呢筆錢。

正所謂馬死落地行，朗尼冇得走谷住留隊，都要展示番積極嘅一面，希望爭取領隊摩連奴信任。佢宜家就同老婆仔仔到希臘渡假，不過就決定今個月底就返曼聯報到，比一般開季訓練提早兩星期，希望用呢兩星期好好操吓，擺脫「月巴」形象，今次朗尼生性，唔知摩連奴會唔會感到安慰。