【李華華Online】許家印呻傳媒唔公平拖累股價 20億美金放券商擺平負面報道
蘋果日報 2020/03/31 20:28
許家印
恒大主席許家印談及20億美元於二手市場買債時面露笑容。
疫情拖累大市急插，恒大（3333）再加埋盈警，股價年初至今跌四成，債價前排同樣直插無水花。恒大主席許家印今日響網上業績會就好似特朗普上身咁話傳媒報道唔公平，有份搞到公司股價跌成咁喎。
許家印今日就話睇啲報道寫恒大盈利腰斬，但就無講埋公司賺少一半之後都係業界利潤TOP 3，覺得咁樣嘅報導係「片面」、「唔太公平」，加埋外圍市況，對公司股價造成比較大影響。
講完呢單佢眼中嘅「片面報道」，隔咗陣再補多單，話睇到有新聞聲稱恒大現金流非常緊張、流金鏈要斷裂喇，「好了，你說斷是了吧？我立即打20億美金到證券公司買債去！」仲話100蚊賣債，60蚊買返黎好賺過賣樓。雖然到最後20億美金使唔到幾多，市場上根本買唔到，公司只能夠買到好少，但20億美元喺證券戶口擺一擺，就再無人話恒大現金流緊張喎。
李華華