糖兄妹開騷邀周國賢做嘉賓 爆事前要請打邊爐兼食雪糕
糖兄妹周國賢海洋公園
糖妹笑指請周國賢做嘉賓,事前要先請他打邊爐同食雪糕。
糖兄妹今晚在海洋公園舉行《糖兄妹再見從前音樂會》,邀請周國賢(Endy)擔任表演嘉賓,Eric Kwok及太太葉佩雯、王敏奕、羅天宇、張子丯等亦有到場支持。由於疫情關係,場內只招待約500名觀眾入場。
糖兄妹在音樂會中,獻唱千禧年代歌曲,並以關菊英的《講不出聲》揭開序幕,繼而再唱出《藍天》、《下一站天后》、《可惜我是水瓶座》、《明年今日》、《終生美麗》及《終生學習》等,更即場邀請fans合唱《死性不改》。在唱《閃着淚光的決定》時,糖妹走到台下與觀眾握手,糖兄亦有獨唱《黑色幽默》,當唱《逃避你》,由於糖兄彈奏出現問題,令糖妹唱不到,糖兄解釋:「我好緊張!」糖妹即打圓場:「唱Live就係咁!」之後還播了糖兄和糖妹一些舊相,當中有糖妹中學年代參加唱歌比賽時、由Endy擔任評判的片段。尾聲時,糖兄妹更與Endy合唱《目黑》和《只此一家》。
糖妹受訪時笑言今次音樂會,是完成了一個小願望:「今晚請到Endy嚟做嘉賓,因為中學年代,我成日唱佢首《目黑》,我參加比賽嘅時候,Endy做評判,點知我搵得返條片出嚟,今晚會播畀大家睇,話畀大家知道我同Endy有啲淵源。」糖妹更笑指要邀請Endy真的不易:「我要請佢打邊爐同食雪糕。」是否視Endy為夢中情人?糖妹即說:「咁又未至於,因為中學嘅時候,有好多歌唱比賽、又或者有暗戀對象都會抄歌詞,一定係Endy首《目黑》,又同薛凱琪合唱,所以每次唱K都會點。」糖兄聽完後即取笑糖妹:「嗰個係薛凱琪,企喺度都型,不過阿妹係牛市。」糖妹笑說:「向上揚,逐漸升高呀嘛!」
問到會否計劃開大型演唱會?糖妹表示下半年要拍戲,加上10周年之後都沒有新歌,所以糖兄會趁糖妹拍戲期間,努力寫歌,糖兄說:「等佢拍完就可以錄音。」他還表示將Cookies的《派對動物》改編成《疫情下沒有派對動物》:「由一首好開心嘅歌變咗好慘嘅歌。」糖妹說:「希望下年有派對啦!」
音樂會上播出糖妹中學年代參加唱歌比賽時、由Endy擔任評判的片段。
糖妹指有暗戀對象要抄歌詞的話,一定會揀抄周國賢首《目黑》。
-----------------------------