因傷退陣嘅劉翔，接受中央電視台訪問時話，唔會怨天尤人，明年仍有機會。佢呢句說話可以講係好多面對緊逆境嘅人一碗心靈雞湯。敏妮噚日睇到一篇大陸嘅評論文章，將劉翔退陣事件，同深滬股市拉上關係，文章內容相當有趣，值得同讀者朋友分享。
作者提到劉翔受傷退陣嘅消息事前冇人能知，不過，炒黃牛飛嘅人以手上得到嘅資訊──就係劉翔入決賽，一定有好多人捧場，門票一定熱炒，所以大手買入110米欄嘅決賽門票。結果門票由於劉翔退陣，售價急跌。

作者認為，掌握訊息係好重要，劉翔會唔會因傷患而出現退陣嘅情況，好難預料，但如果黃牛黨掌握劉翔受傷患困擾至乜嘢程度，起碼會諗吓使唔使為手上嘅門票買個保險。
至於買保險，作者講笑話，最衰奧運會門票唔似得股市，有對冲工具例如期權咁可以對冲風險，否則，即使手上門票價格大跌，起碼仲有一個安全網。不過，以現時內地股市嚟講，散戶同黃牛黨冇分別，大陸講咗好耐嘅股指期貨一路都未有推出，散戶只可以買升、睇好，一旦有任何風吹草動，散戶嘅選擇係坐艇，果斷啲嘅就會沽貨離場，因為佢哋基本上冇得睇淡。

正如奧運場上為咗欄王而嚟捧場嘅觀眾，見到劉翔退陣，只有喺看台喊，又或者起身離場。至於場外嘅黃牛黨除咗割價求售，仲可以仿效股市中運作，就係搵人接火棒，同啲唔掌握資訊又想睇比賽嘅民眾講：「鳥巢晚晚有煙花睇，見大家都係中國人，平啲賣張飛畀你。」

網誌： http://wanmanli.com/blogs/