呢幾年越嚟越多人做激光矯視，原來連戴慣眼鏡嘅衞福局局長周一嶽，一年前都有諗過做激光矯視。咁點解周局長𠵱家仲戴住眼鏡呢？噚日佢出席養和醫院陳蔭燊視力矯正中心十周年致辭嗰陣，就自爆原來係因為老婆大人擔心佢唔戴眼鏡個樣唔夠成熟，所以結果都係冇做。
前電視新聞主播黃德如就冇考慮咁多，就算主診醫生李維達同佢講明佢眼亁、角膜薄兼瞳孔大，做激光矯視會有一定風險，佢都一於好少理，三年前就做咗手術。
噚日仲專登返養和做病人分享，不過就被李維達踢爆姑娘喺黃德如個病人排板上畫咗紅點，即係特別難搞咁解，唔知難搞係因為佢問題多要特別照顧，抑或另一啲問題，就唔知喇！