國中（202）啱啱以大成交破咗小三角頂，埋位炒國中。上星期尾神仙股鬥癲，尤其係殼股，好似創新能源（702），星期五由8仙水位，單日狂抽162%到0.213元、福邦（1041）兩日亦大升62%到6仙水位。兩家企業嘅市值斷倍升，去到6億銀。國中家陣不過3.7仙水位，總市值2億銀咁大把，神仙股大龍鳳，國中細細隻啱炒。
再講，國中呢期協議出售上海物業，售價6.18億銀，又計劃發展水務，有消息跟尾，唔係亁炒牛河之餘，計計數，協議出售物業套現資金，每股等值0.11元，幾乎係國中現價3倍！而呢期水務股隻隻生猛，P/B已經斷倍計數，市場仍然受落。國中最新NAV12.3仙，P/B講緊0.3倍（即係大折讓70%）咁大把，有得諗。國中三角量度升幅目標4.4仙，現價潛在回報率19%，但股仔大時代，潛在升幅，往往用把尺都未必度得晒。

第一上海折讓大

第一上海（227）旗下證券業，肯定受惠呢期港股成交壯旺，下半年業績應該好有睇頭。又第一上海最新NAV1.2元，現價（0.71元）折讓40%，係折讓最大嘅證券股之一，證券股遲早開車，要揀，揀第一上海。
再講，集團6月底?住淨現金2.8億銀，連埋出售上海物業所得1.58億銀，估計家陣淨現金去到近4.4億銀，相等每股0.37元，係現價50%樓上，淨現金奇高，避風力又加強。第一上海呢期蓄勢破短期橫行頂0.74元，一突破，可以飛天，乜都唔使講，目標價睇每股NAV1.2元。
錢雋