由ARON、JR、REN及白虎組成嘅韓國男團小分隊NU’EST W，噚晚喺九展舉行由德碩文化傳播有限公司主辦嘅《2017 NU'EST SPECIAL CONCERT in HONGKONG》，勁歌熱舞兩小時冧粉絲。

事隔兩年再來港嘅NU’EST W，今次因為成員旼泫入選為限定男團Wanna One成員而缺席，不過依然冇損粉絲熱情。NU’EST W除咗又唱又跳，更喺VCR中花足心機，扮上班族開會討論點樣冧粉絲，旼泫就以「放大假嘅代理」身份亮相，4子喺VCR中不時賣萌，REN更學Wanna One成員朴志訓做「在我心裏儲存」嘅手勢，又輪流坐對方大髀，HeHe味十足。

而當4子唱出《Introduce Me to Your Noona》時，REN更以讀白方式讀出「你冇男朋友吧？咁我可以鍾意你嗎？」句子，冧到粉絲尖叫得更大聲。隨後4子各自獻唱一小段新碟嘅Solo曲，同時抽出4位幸運粉絲獲得簽名CD。白虎就大讚粉絲好熱情、反應好好，令佢哋都好開心。閒談時NU’EST W提到對香港嘅深刻印象，4子直言蛋撻、點心、雲吞麵等好好味，又話想睇夜景、行香港嘅街道，REN就賣口乖大讚港迷好靚女，隨後白虎再唱國語歌《想你的夜》，前日記者會上已經忘詞嘅佢，噚晚都係唔記得歌詞，粉絲即時合唱救場。

NU’EST W安哥時表示：「因為你哋嘅熱情而度過咗個幸福嘅晚上，係一個好好嘅回憶，希望可以快啲再嚟香港，再送上更多帥氣、有型嘅舞台畀大家，多謝你哋。」同時又用廣東話向粉絲講「好掛住你」、「一齊幸福快樂」、「我愛你哋」，隨後於歌曲《Bickering》時4子更拋波波到台下，引起粉絲瘋搶，最後4子90度鞠躬感謝粉絲，並一邊揮手講再見一邊返後台。

更多韓流，喺晒《娛果》
http://fb.com/appledailyent