由韓劇《秘密花園》男星玄彬孖韓劇《Doctors》女星朴信惠主演嘅tvN新劇《阿爾罕布拉宮的回憶》，前日首播，Netflix亦將於同日起全球播映，每周上架最新兩集。

噚晚第二集講到玄彬為咗搵天才程式設計師燦烈而來到西班牙嘅格拉納達，並入住朴信惠開設嘅旅館，點知玄彬因為房間問題同朴信惠起爭執，仲激到朴信惠爆喊，而此時玄彬發現朴信惠係燦烈嘅家姐，為咗可以成功買下燦烈嘅AR遊戲，玄彬就要𠱁返身為燦烈監護人嘅朴信惠。

同時玄彬亦喺當地遇上前妻及死敵朴勳，原來朴勳曾經係玄彬好朋友，但最後朴勳卻搶走佢前妻，令到玄彬同朴勳交惡。噚晚結尾講到玄彬一年後喺去格拉納達嘅火車上同一班蒙面人展開槍戰，玄彬仲好似Mark哥上身一樣，以一敵十來展開槍戰。

不過噚晚一集《阿爾罕布拉宮的回憶》收視卻不升反跌，比第一集微跌，錄得7.363%收視。

精選韓流，喺晒《娛果》
http://fb.com/appledailyent