當年今日
關於我們

【《女皇撞到正》】甄栢榮為親人拍感人電影:覺得好笑,大家就會感動

蘋果日報 2018/09/25 07:00

甄栢榮女皇撞到正葛文輝邵美琪張繼聰周秀娜MAGGIE

甄栢榮導演首次獨立編導嘅驚喜電影《女皇撞到正》,今次又再搵嚟老友兼合作夥伴、樂隊ToNick主音趙善恆(恆仔)合作,由恆仔主唱主題曲《你好》,兩個相識多年,老友鬼鬼之餘又有默契。
《女》片由周秀娜、張繼聰、葛文輝、邵美琪(Maggie)等主演,講述一個充滿親情嘅感人故事,當中不乏導演拿手嘅奇幻情節,甄導演話:「我應承咗自己嘅親人,去做一啲感人嘅故仔,好想去做一次!首要條件要令人感動嘅係一定要笑咗先,如果大家愛上咗啲角色,覺得好笑,大家就會感動,我成個諗法係咁,之後同編劇一齊去創作。」出自甄導演嘅手筆,當然少不了奇幻情節,神神怪怪,佢話:「我好鍾意奇幻題材,以前老師成日問點解呢個世界需要電影?佢話故仔可以完美到本身嘅現實世界嘅不完美,我覺得幾有趣。」甄導演希望大家可以離開吓現實世界,由佢帶領大家走進佢嘅電影世界入面,甄導演一直想探討生死題材,但一直未夠膽,佢笑話:「依家半熟,當知道死忘係乜事,就更加知道活着係應該做啲乜嘢,每次對呢類嘢都好深刻,其實我好想拍殯儀業嘅故仔。」
今次搵嚟一眾喜劇演員演出,甄導演大讚效果好好,仲話自己好幸福,佢話:「呀聰好主動,夜媽媽會同我傾故仔,我好鍾意咁樣,葛文輝、Maggie同吳耀漢3位前輩人馬,每次見我都會好緊張,我要做足功課,說服佢哋做我心目中嘅嘢,同時佢哋有好多input,冇諗過Maggie真係做得好好,佢好touch到我,有啲對白好難講,佢演譯得好舒服,我真係好想同佢繼續合作落去。」
去年甄導演同恆仔合導《救殭清道夫》,今次甄導笑言冇咗恆仔即感壓力,佢話:「壓力係冇同恆導一齊合作,好多嘢要自己解決,我想將訊息帶出嚟,成績係點我唔在意。」
而恆仔隊友睇完試片即時有感覺,仲一齊寫咗主題曲,恆仔話:「其實係好開心嘅,ToNick嘅第一首MV我捉埋甄導演拍,中間大家有好多嘢唔使點講,大家經歷咗好多嘢,知道諗法。」甄導演笑言大家會用創作去交手,感覺如高手過招。
採訪:羅慧敏
攝影、攝錄:仇志德
化妝、髮型:Kylah Chan Makeup and Art(恆仔)
服裝提供:Scotch and Soda、Levi's(恆仔)
精選娛聞,喺晒《娛果》
http://fb.com/appledailyent
empty
去年甄導演同恆仔合導《救殭清道夫》
empty
今次搵嚟一眾喜劇演員演出,甄導演大讚效果好好
empty
今次甄導笑言冇咗恆仔即感壓力
empty
恆仔主唱主題曲《你好》