早前「呻」過做咗特首之後日忙夜忙嘅林鄭月娥，噚日又喺Facebook交代自己忙碌的一天，包括朝早同廣東省省長馬興瑞食早餐，之後就同中國科學院控股有限公司董事長吳樂斌會面，更喺一日內見咗三大中資銀行嘅董事長。咪以為，咁就收得工，娥特最後更連「王子」都唔放過，見埋巴塞爾城市州州長伊麗莎白．阿克曼、香港美國商會代表同沙地阿拉伯Turki Al Faisal王子。

正當大家以為呢個又係娥特一個悶post之際，娥特就喺帖文尾段送上「彩蛋」：「忙了一整日，幸好我已預留晚上同兆波燭光晚餐，慶祝佢嘅生日」，再上載一張似乎由64歲壽星佬林兆波揸機、同娥特碰杯嘅合照，hashtag埋「生日快樂」。

娥特呢次高調「放閃」，怕且唔會係特首辦職員自把自為之作啩？而一向怕醜嘅壽星佬兆波，唔知係咪唔慣愛得高調，冇乜笑容噃......