李思欣嫁咗范振鋒眨眼4年，呢幾日李思欣竟然畀人喺微博私信佢出席飯局兼過夜，仲話可以任佢開價，係咁騷擾到思欣火都嚟埋，佢今午就cap圖放咗喺微信公開呢件事，佢仲留言：「對一切正拍攝商演，非常歡迎，但一些不德道德的交易，本人絕不會接，請尊重我們表演工作者及尊重自己。」

《蘋果》今日打畀思欣，佢勞氣話：「對方透過微博私信傳咗好多次嚟，我冇覆佢又傳，我鄭重表示絕對唔接呢啲唔正常工作。佢仲話可以出到幾十萬我飯局價，係咁叫我開價。」

思欣自爆早前返內地工作，為方便在拍攝場地附近想租住一晚酒店，點知工作人員話唔收佢錢畀佢住，但要佢交換微信，思欣當然唔貪小便宜，斷然拒絕。思欣因為呢件事同老公范振鋒商量，老公當然嬲豬。對於思欣變人妻都有巿有價，范振鋒都喺電話回覆：「呢啲巿場唔要啦，即使窮都有飯開，希望嗰啲人尊重呢行。」