「我比較花心，所以好鍾意成日轉wallpaper，影得最多就係屋企隻貓同狗，之後就會將佢哋嘅cute樣做wallpaper，都試過影朋友同風景。留言信箱我就唔鍾意用啲花臣嘢，只會用番基本嘅留言錄音，不過以前喺外國讀書時，就同兩個女仔朋友一齊錄咗一段好搞笑嘅留言，就係問打電話嘅人鍾意邊個多啲，當然只係玩嘅性質啦！」

吳日言見狗開心

「唔使估大家都知我會用屋企隻狗winwin做model啦，好多時我都會鋪排成個構圖，今次呢張就搵埋我最鍾意嘅公仔做winwin拍檔，影呢啲相唔難，因為winwin識望鏡頭，佢仲會唔郁，等我同佢影張靚相，之後望住張wallpaper就當見到佢一樣，成個人都即刻開心晒。至於留言信箱就冇乜特別搞笑，都係最基本嗰幾句！」

李彩華火火催運

「我個電話嘅wallpaper最多就係家中五隻寶貝狗，而呢張就係我個孫仔『火火』。因為我五行欠火，所以我會將屋企嘅狗仔名全部改為同火有關，咁先夠旺嘛。至於留言信箱，我都成日會轉個錄音，𠵱家用緊嗰個好搞笑，我會扮聲做『哀家』，仲叫啲朋友有乜事都唔好留言畀我，最好係SMS畀我囉。」

陸詩韻友情轉載

「我間唔中就會轉吓個電話嘅wallpaper，好多時都係用啲卡通或者動物相，因為睇到時會好開心，不過我就好少自己download，通常都係朋友仔send畀我。我個留言一啲都唔特別，只係講出我個電話號碼之後就叫人留言。我唔想錄低一啲鬼馬嘅留言，因為我怕有人搵我做嘢時，聽到會嚇親佢哋。」

關楚耀隱藏腹肌

「呢幅wallpaper係我幾個月前影，當時我嘅身形係最fit，有成六口舊腹肌，但係𠵱家太忙，成個人縮咗水，身形keep唔到，所以我就將張相做wallpaper，提醒自己要操練，希望有日回復身形。我冇特別嘅留言信箱，但就幫朋友錄過一個『佢𠵱家唔得閒聽你電話，因為佢聽緊關楚耀嘅歌，等佢聽完之後先打畀你啦！』」

少爺占觀眾陪伴

「呢張wallpaper相係我之前睇鄭中基演唱會時拍低觀眾熱烈嘅反應，用咗已經一段時間，只要我覺得自己孤單時，就會拎出嚟望一望，立即就會覺得好多人陪住自己。其實我本身冇用留言，不過我有幫朋友錄過一啲好抵死嘅留言，好似係『佢死咗嘞，仲打嚟做乜，byebye。』因為我俾人叫做臭口組合，所以錄留言都要貫徹始終。」

黃又南龍顏護體

「我wallpaper張相係李小龍，因為天佑好鍾意李小龍，所以我開始受佢感染。同埋我呢排成日都有做健身，於是咪整咗張李小龍嘅相做wallpaper，感覺上好似勁啲咁。至於我嘅留言就係話『留言啦，唔該』，因為之前試過留『我𠵱家做緊嘢唔得閒，請你留言啦，我有時間就會覆你㗎啦』，可能呢個留言太長，好多啲人都唔會留言。」

古巨基美女狂轉

「我電話張wallpaper係朋友send畀我，我覺得張相好得意。佢唔係普通一張相咁簡單，其實係個動畫，個公仔會轉㗎！我覺得幾得意吖，360度轉。而且男仔一定係鍾意睇美女嘅。」另外，我個留言信箱講嘅嘢好普通咋，但係就會用普通話講：『我現在不能接聽你的電話，請你留言，我會盡快回覆。』」
採訪：駱華齡、李珮洳、王連連
攝影：仇志德