聖誕假期，係泰國布吉島嘅旅遊旺季，全世界嘅遊客都會揀呢個長假期去布吉島打波、游水、潛水，其中香港人不在少數，喺布吉市中心到處都聽到廣東話。外國人去布吉，鍾意留在酒店泳池或沙灘曬太陽、睇小說，間中游吓水，香港人就冇耐性踎響酒店，一定係去市中心行街購物食海鮮，故此市內行人，以我哋同胞為主。
勢估唔到，○四年最後一單大新聞，係亞洲地震海嘯風暴，執筆時已導致死亡五萬幾人，百幾萬人民受到直接影響，往布吉旅遊嘅遊客被困。如此大慘劇，世所罕見，海嘯竟然可以在兩個鐘頭內，橫渡大洋，兩個鐘頭內，就由地震中心（蘇門答臘）打到去斯里蘭卡與印度。反而鄰近嘅新加坡竟然不受影響，自然災害之難預測，冇得預防，又一明證。

左丁山去過布吉島好多次，對當地甚有感情。聽CNN報道話海嘯摧毀咗LagunaBeach，為之一驚，呢個沙灘上有三間酒店，喜來登最為豪華，左丁山以前住過位於中間嘅酒店（當年名為LagunaDusitThaui），好似樓高四層，寧靜異常，係一流度假地方，銀行家廖烈科就係在此沙灘游水，不幸心臟病發嘅。三間靚酒店如遭海嘯摧毀，損失慘重矣。
俗語云欺山莫欺水，但現代人鍾意欺水多過欺山，水上玩意多到數唔晒，又有得威（如坐大型遊艇），唔使爬山咁身水身汗，確係好玩好多，點諗到會喺布吉島咁好潛水地方潛水，竟然會在毫無預警嘅情況下，成百名潛水者就此去咗見海龍皇，嗚呼哀哉。更首當其衝嘅，係沿海打魚嘅漁民，一下子人財（漁船就係生財工具）盡失，令人無限哀痛。