除咗港滙跌，人仔跌，美股跌，港股跌之外，其實今朝日經指數都一度跌成771點穿17,000關口，尾市先回順跌少咗，收市跌474點。市場分析就話，日股跌係因為憂慮環球經濟增長放緩，同埋受油價影響喎！呢啲因素其實都講咗好耐，又點會無啦啦驚到狂跌丫！實情係…

尋日SMAP解散的消息實在太太太令人震驚﹗

作為日本最強國民男子組合，SMAP於八十年代尾出道，咁啱就係日本經濟步入衰退之際，亦都係日本流行文化最風靡全球之時，九十年代邊個唔睇日劇，唔愛木村架？所以嗰陣日本娛樂事業有份撐住日本經濟，SMAP當然功不可沒啦！

除咗經濟上，SMAP政治上都好有用，尤其是中日關係方面上好幫得手。話說2011年，前總理溫家寶訪問日本嗰陣，都有同SMAP見面，仲邀請他們去內地演出，以紀念中日關係正常化40周年。同年9月SMAP就係北京工人體育場舉行出道以來第一場海外演唱會，外間評論都話，SMAP促進中日關係有功。

最最重要的一點，當年迷SMAP嗰班日本少女，如無意外已經進化成最有財力嘅渡邊太太，每當生活不如意，諗起陪著佢地咁多年嘅五個男人，簡直為心靈帶來一點慰藉。如果你係九十後，你就幻想下SMAP等於或者勁過今日嘅BIGBANG啦！

所以SMAP拆夥，除咗影響到日本經濟外，又有機會令中日關係緊張，最重要係影響到日本嗰班渡邊太太心情，同福山雅治宣佈結婚佢公司股價跌一樣，班太太今朝起身就發脾氣掟貨，所以今朝日股咪跌到咁慘！

掌握財經生活資訊，即Like「蘋果ATM」fb專頁啦！
http://fb.com/appledailyatm