賣飛撞正武肺丨釗峰謝觀眾義無反顧懲罰 龍小菌：動盪社會需要音樂
蘋果日報 2020/12/01 17:46
岑寧兒梁釗峰龍小菌武漢肺炎雷有輝
網上圖片
武漢肺炎第4波疫情殺到，公眾娛樂場所須於周三起關閉兩周，娛樂圈都受波及，戲院及政府表演場地都要關閉，至於演唱會就未知會否受影響，民政事務局局長徐英偉今早接受商台節目訪問表示：「答你唔到住，都要睇個數字。」
入行11年的C AllStar成員梁釗峰，單飛發展後將於12月26日假麥花臣場館舉行「梁釗峰音樂會2020」，門票撞正昨日開賣，釗峰在社交網留言：「疫情下要義無反顧地買飛懲罰一個歌手睇實體show，要考慮嘅嘢似乎好似多咗，所以份外珍惜。既然買飛嘅人罰得大大力，我哋同團隊都會大大力準備，大大力負責任，然後重點當然大大力Good show。當然大前提，咩都係假，健康、安全一定係放喺第一位。」釗峰接受《蘋果》訪問表示：「疫情難免有影響㗎啦，買飛嘅人可能會顧慮多咗。不過都係嗰句，當然健康安全最緊要。當然會留意最新進展同措施公佈，而家暫時都係全力準備中嘅。」
岑寧兒新碟分享會延期
龍小菌擔任主音的樂隊帶菌者，將於明年1月23日在九展MusicZone舉行新碟發佈會，門票於今日發售，小菌在社交網呻：「本來，好高興同期待想同你哋講，帶菌者終於要開騷了！不過，就算經過咗幾個月嘅準備，再費盡心血，再周全準備，喺呢個充滿問號同未知嘅防疫政策下，的確令我哋感到不安同惆悵。嗯，呢段日子，甚至今日，又有邊個唔感到不安，唔感到惆悵？因為我哋相信，越動盪嘅社會，越需要音樂。同時，我哋都係需要您。」小菌回覆《蘋果》說：「唉，我都唔知點，梗係擔心啦，其實我哋都擔心咗成年，所以冇得再擔心，我覺得我哋順唔順利唔緊要，香港順利先最緊要。」
將於本月19及20日在西九開騷的雷有輝，以短訊回覆《蘋果》：「而家仲未知，都有啲擔心。」另外，岑寧兒原定本周六及日假Lost Stars舉行4場新碟分享會，今日在社交網宣佈受疫情影響延期：「抱歉啊各位辛苦搶票的朋友，沒辦法不延期了，希望可以盡快再安排見面， 小心保重啊！」
雷有輝本月19日開騷，坦言擔心受疫情影響。（網上截圖）
龍小菌擔任主音的樂隊帶菌者將於明年1月舉行新碟發佈會，今日開始賣飛。（網上截圖）
龍小菌坦言擔心咗成年，未知帶菌者能否如期舉行發佈會。（網上圖片）
釗峰入行11年於下月舉行個人演唱會，昨日開始賣飛。（網上截圖）
岑寧兒宣佈新歌分享會要延期。（網上截圖）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！