當年今日

股海實戰錄:成交增加 港股續升

蘋果日報 2002/01/08 00:00


成交繼續增,港股未升完。噚日港股再升190點,收11892,成交增至93億元,反映入市資金持續增加,買盤動力加強。
恒指噚日下晝喺11900附近窄幅上落,反映好淡都喺萬二關前收集彈藥,準備大決戰。好友能否一舉攻破萬二關,主要睇杜指能否守穩喺250日線(現處10207)之上。目前形勢對好友有利,估計恒指升破萬二關機會較大,但短期須留意恒指成交變化,若成交顯著回落,無論升跌都好,都要打醒精神。
趙飛雲前日講過,如果大市上試12000至12600,中移動(941)將接力成為升市火車頭,噚日早市喺28.10元買咗5000股。中移動技術走勢確係靚,短期升破30元機會相當大。不過買中移動只係短炒,如果升近30元受阻,會先計數走人。

興業追落後勁升
上周六推介嘅香港興業(480)噚日勁升11%,收2.40元,其實只係炒落後咁簡單,地產大藍籌升得多,輪都輪到大落後嘅興業。趙飛雲買咗中移動後,現金有限,所以冇追到興業,如果讀者上咗車,可繼續持貨觀望。