港股今日反彈非常吸引，融創（1918）升一成，舜宇（2382）升6%，其餘熱炒股反彈唔夠4%都可以恥笑佢弱雞。雖然係咁，但熱炒股普遍未收復星期一失地，就算彈最勁嘅融創，都仲未反彈到調整浪幅度嘅0.618倍。論指數，年初至今恒指支持位250小時線（延伸至27,679點），呢一刻仲未收復兼企得穩，未足夠確認市況已雨過天晴。悲觀劇本下，如果大調整未完，未來一兩個日應該會再跌過；樂觀劇本下，調整已完，喺今日反彈成交偏弱之下，預期會Chok住打底而非直線反彈，有耐性等多一兩日，就自然有更清晰picture，到時再入市加碼，睇怕都有位買，未算遲。

熱炒股內房、科網之類，位處調整風眼，同恒指齊上齊落，唔算特別跑得贏，賭單邊嘅話，潛在升幅同跌幅差唔多，冇乜着數，反而濠賭股已普遍上番高位，例如銀娛（027）、新濠（200），只要確認市況回穩，兩隻強勢賭股可考慮先上車。

晉佳

蘋果財經，關心你飯碗
http://fb.com/appledailyatm