許志安同樂隊Dear Jane今日喺商台接受訪問，宣傳新歌《非安全地帶》，安仔表示呢首歌係帶出每個人要跳出自己安全保護網先睇清楚呢個世界，要有種永不言敗嘅感覺，因為年紀越來越大就會習慣咗，唔去改變，所以呢首歌好正能量。Tim@Dear Jane指安仔夠Rock，同大前輩合作冇壓力。

對於老婆鄭秀文（Sammi）感冒未癒、聲音沙啞，仍堅持開演唱會，安仔則以行動支持，晚晚去捧場。講到Sammi噚晚以「我老公嘅老友」介紹張衛健出嚟，安仔表示冇聽到，問到Sammi平時係咪叫佢做老公？安仔笑笑口咁話：「唔係喎，我好多名。」叫「BB豬」？安仔傻笑稱：「嘩，你真係吖……佢一期期，突然間就講，梗係唔講畀你哋聽啦！」

講到張衛健噚晚喺Sammi個唱中，大爆結婚嘅時候，懷疑安仔同Sammi復合，安仔表示當時未復合。

安仔表示好擔心Sammi情況，佢就話：「冇辦法，病，每個人都有，盡咗力就係最好，我反而以另一角度去欣賞個騷。」安仔直言心痛Sammi捱病演出：「有，但冇辦法，人生總要面對未知同唔能夠預計嘅嘢，咁先好玩。」