一向敢言嘅人大常委會副委員長成思危,11月尾接受內地傳媒訪問,對於內地開始有人睇07年滬綜指數將見4000點,佢老人家認為呢啲言論屬於「頭腦發熱」,佢就唔信可以升到呢個水位(較昨日收市高85%),佢仲警告,如果基礎唔打穩,泡沫最終會破滅,又用逆向理論告誡投資者:「當你興高采烈的時候,你要賣出,當你痛哭流涕的時候,你要買入。」
咁又係嘅,華華睇過幾位成功嘅國際大炒家同投資者寫嘅「投資真經」,佢哋無一例外係逆向實踐者,不過睇見姨媽姑姐都講股,四圍攞貼士,有幾多散戶能夠按捺得住呀。成成不但苦口婆心,原來仲有做功課,佢話舊年做過一個研究,成個股市過千間上市公司,只得400間公司有投資價值咋。