對賭仔嚟講，俾底褲「笠頭」係大忌；但對富咸中場布拿特，唔單止唔介意底褲笠頭，更加爛玩到坐住裝滿成車臭衫嘅手推車，撞向隊友㖭！
德國中場布拿特今季加盟富咸，立即有好表現，仲幫球隊射入兩球；不過佢上周六作客紐卡素，與對方中場柏加一次身體碰撞，搞到膝蓋重創，要兩個月後先可以復出。球迷暫時睇唔到27歲嘅布拿特喺球場上滿場飛，不過就可以欣賞一下布拿特「爛玩」一面。
youtube.com一套名為《JimmyBullardintheJJBChangingRooms》嘅短片，上季仍然效力另一英超球隊韋根嘅布拿特，充份顯示佢貪玩一面。全長44秒嘅短片，背景喺韋根更衣室內，短片一開始已見布拿特全身赤裸，坐喺裝滿臭衫嘅手推車內，佢仲貪玩到隨手攞起內褲當帽戴。

隊友充當攝影師

當布拿特洋洋自得之際，隊友麥漢充當「司機」將他連人帶車推向隊友，坐在更衣室一旁嘅羅拔斯同巴尼斯，笑到見牙唔見眼，巴尼斯仲攞手機影埋一份㖭！
喺網上討論區，有球迷對布拿特爛玩作回應。Delfranco驚言：「嘩！條片裏面個人身上無衫又無褲，企喺張長櫈度唔知做咩？」cooney09大讚：「段片好搞笑，但我覺得布拿特簡直係球場天才，佢好好波！」另外，有不少人對布拿特重傷表示同情。PavelNedved直言：「條友真係超好波，有啲戥佢唔抵！」
http://www.youtube.com/watch?v=GKJn1fQPDUg&NR