最近有網民喺Twitter發現一張爆相，係一場西維爾同維拉利爾U12嘅比賽，有位着上西維爾10號波衫嘅小朋友，竟然高過同齡嘅對手差唔多兩個頭。大家當然不禁想問呢位U12「巨人」都底食咗咩發育成咁，甚至質疑到底佢係咪真係12歲或以下，但如果好記性，應該記得曼聯中鋒盧卡古，13歲嗰陣都係令大家以為佢報細數，同同齡小朋友比賽嗰陣，就好似一個大人畀一班細路圍住踢波咁！

或者有啲人真係細細個就生得好大隻，呢位西維爾黑人小將就可能係咁，網上除咗一張佢同對手比賽，高過人成兩個頭嘅相，仲有一張係佢同着上11號波衫嘅隊友背面相，一樣係高成兩個頭，咁證明唔係角度問題，目測佢可能有6呎2或6呎3咁高。

好多網民質疑咁問「呢個suppose係一場U12比賽呀！」、「到底我係咪睇錯咗？」，其中一位球迷仲tag埋西維爾個官方Twitter，問：「你哋到底畀班細路食咗咩呀？」點知西維爾竟然真係有回佢咁講：「球會秘密」，即係無可奉告喇！就連西甲官方Twitter亦有上載呢位10號仔同11號隊友張背面相，caption都以「Big Man」嚟形容呢位大隻仔，之後仲笑話係「老竇同個仔」。

睇到呢位西維爾大隻仔，即刻諗起當年13歲又係嚇親人嘅「渣古」盧卡古。呢位比利時前鋒細細個都係天賦異稟，一樣高過同齡球原成兩個頭，即係話呢位西維爾大隻仔唔使驚被人用奇異眼光當怪人睇，或者佢可以渣古為榜樣，有一日成為身價達7,500萬鎊嘅球員。

--------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
--------------------
【新聞有價】繼續撐蘋果
請往蘋果日報網站了解更多
--------------------
《體蘋果》陪你睇波講波
https://www.fb.com/appledailysports