一田百貨及康宏金融前CEO莊偉忠今日在個人社交網發文，批香港政府「一意孤行，傲慢專橫，漠視民意」，又批建制派議員「與民為敵，毫無自由意志」。他直言被人「搓圓撳扁好耐，今鋪忍屎忍尿，都忍唔到呢啲出賣香港利益嘅人型動物。」

他呼籲香港人要「vote them down」，在7月2日截止前登記做選民。他認為這一刻團結最重要，「雖然唔知道係咪有志者事竟成，但無志者，做鬼都唔靈。」

莊偉忠FB原文︰

生日禮物

港府一意孤行，傲慢專橫，漠視民意，一副睬你都儍嘅嘴臉；建制派裏應外合，支持「逃犯條例」修訂，與民為敵，亳（毫）無自由意志。咁我哋可以做啲乜？眾志成城，vote them down可也。

撫心自問，畀（俾）人搓圓撳扁好耐，今鋪忍屎忍尿，都忍唔到呢啲出賣香港利益嘅人型動物。我希望今年7月2日生日，收到你哋通知，已經同我一樣，登記做選民，尤其係18 - 25歲嘅年輕人同埋討厭政治嘅中年人，呢份事先張揚嘅卑微盼望，至係最佳生日禮物。

做人嘅嘢，記住係分站長途接力賽，一枝竹仔易折彎，幾枝竹一扎斷折難，團結方可做大事，有人擅長打前鋒，有人鍾意打後衞，或者搖旗吶喊斟茶遞水，有時間，閒來無事可以乘搭公共交通工具思考人生，有呠呠車，可以慢駛欣賞吓路上美景，只要有心，各司其職，互補長短，雖然唔知道係咪有志者事竟成，但無志者，做鬼都唔靈。

拜託！

----------------------------
【新聞有價】6月17日起 繼續撐蘋果
http://bit.ly/2IJ24ZR