大老闆田少噚日去咗香港青年協會搞嘅「營『宵』有道」頒獎禮，同近百位搞年宵攤位嘅年輕人講老闆心得，仲即時搞咗場答問大會。身為煲呔學弟嘅香港華仁書院中六學生張家浚，問若果做生意時遇到有朋友攞着數應該點做？即係問佢「愛兄弟定愛黃金」啦。
田少話做到佢家吓咁嘅地位，顧吓人情都冇所謂；但若果係創業新仔或者上市公司主席，就點都要利字當頭，寧願賺咗錢先益老友，否則肯定俾人情債累到破產。田少仲乘機講打工仔上位大法，除咗要學嘢增值做嘢勤力，仲要識do兼識睇眉頭眼額，否則聽冇運行，唔知呢番話有冇同煲呔講過呢？

煲呔另一位學弟阮松昕就問香港未來怎麼辦？田少即刻叫佢學好英文，仲怨近年香港英文水準低咗，商界好擔心。
據青協所講，30組老闆仔當中有三分二賺錢，最多接近3萬落袋，但有一組淨蝕6萬蚊，真係一殼眼淚兼眼坦坦。專賣「豬腩肉」咕𠱸嘅華仁仔喺中學組攞晒彩，投資6萬蚊狂賺26,000蚊，但佢哋話最緊要係贏咗兄弟情，即係同田少唱反調啫。