張文光早前一家三口去日本四國旅行，最開心就係去咗一個叫直島嘅藝術小島，睇到好多新奇又有趣嘅藝術品，包括日本著名藝術家草間彌生設計嘅大南瓜。呢廿幾日奇妙旅程令張文好回味，最遺憾係旅途期間聽到中大同班同學馬力病逝，返到香港已經見唔到個老友。
一日朋友就一世朋友，張文提起呢位老友好傷感，事關喺佢心目中，馬力係一個願意為理想奮鬥嘅正人君子，係一個好有禮嘅書生。佢話雖然大家愛國觀念唔同，但都冇影響友情，尤其佢哋兩個都係好書之人，閒時成日交換讀書情報，話畀對方知邊本新書值得一看，遇到好書時，馬力更加會送埋本書畀張文，張文話呢種以書會友嘅友誼，馬力去後世間難求。

私人身份致祭

雖然馬力早前嘅六四言論傷咗唔少港人嘅心，身為支聯會常委嘅張文認為唔應該以偏概全，因為一個人嘅一生，唔應該只由一、兩句說話就定調。張文話會抽時間到民建聯總部簽弔唁冊，亦一定會到靈前鞠躬，向老友道別，佢強調係以私人身份悼念老友，同佢支聯會或民主黨身份無關。