方力申同杜如風今日喺中環出席信用卡活動，杜如風自爆16歲已經開始碌爆咭，更試過狂碌6位數字，媽媽曾經剪咗佢4張信用咭，杜如風話：「我一個人喺加拿大好辛苦㗎，又鍾意儲垃圾，總之名牌就不停買，一路都有我媽咪幫我儲錢幫我還，o依家已經少買咗。」

提到之前喺日本拍旅遊特輯時着睡衣浸溫泉，被網民批評佢不尊重當地文化，杜如風話：「我都有聽聞，但我節目就係玩，一直以嚟都係娛樂大家，why so serious？點解要咁嚴謹呢？大家都知我唔會除衫！」至於明年農曆新年佢會再次帶團去日本，團費達每位六位數字，佢笑話：「好大壓力，人哋畀咁多錢，到時我表演乜好呢？」

另外，原來小方早已申請冇限額信用咭畀媽咪，佢笑言媽媽會錫住碌，仲話一知佢大使就要加家用。問到佢會唔會出信用咭畀女友？小方笑話：「我都希望有能力、胸襟同信任，但出卡畀女友未必會，老婆啦，其實我以前都唔多女朋友，都信任佢嘅，不過如果畀媽咪知道，家用一定加到不得了，咁就大鑊，會被經濟封鎖！」