個名喺國慶晚宴請帖被印錯做「何傻賢」嘅民建聯立法會議員何俊賢，今朝同漁農界出席政府第二場土地諮詢大會。八方本來好專注咁聽緊啲農民評論政府嘅農業政策同土地規劃，但一度俾台上何俊賢嘅新髮型，吸引咗目光。點解？因為八方一睇，就覺得「傻賢」呢個skinny haircut，激似日本動畫《機靈小和尚》嘅主角一休和尚。

幾年前，何俊賢俾傳媒發現，佢喺特首答問會用手提電腦瀏覽淘寶網，又用手機上網瀏覽股票網站。不過何俊賢當時唔認自己開會上網購物，話個淘寶網係上次家人借用電腦嗰陣，瀏覽之後未有關掉，話自己未有刻意觀看；但佢就認有用手機瀏覽股票網，不過係因為特首講緊樓市「辣招」，佢先上網瀏覽地產股走勢，強調佢本人無持有地產股，只係揸銀行股做儲蓄喎。