《踩過界》啱啱播出第二集，觀眾反應一致都覺得王浩信演技有進步，連盲人飲水等等嘅細節位都跟足，而且主題曲唱得唔錯，仲有網民覺得奇怪點解王浩信咁唱得都唔叫佢唱多兩嘴，之不過蔡思貝嘅表現就令套劇有少少失色。其實套劇唔知係唔係因為同愛奇藝合作嘅關係，無論題材、拍攝手法等都睇得出少左陣「大台味」。

睇咗兩集嚟講，演員對白上相比大台「自家炮製」嘅劇集多咗一份貼地嘅感覺，另外導演都應該幾鍾意星爺，因為有唔少場面都有星爺嘅影子，而喺題材方面，今集就講到譚凱琪扮演相對上喺香港比較少人熟悉嘅「行為藝術家」，再借題發揮影射先入為主，站喺道德高地肆意批判等社會上意識形態嘅概念，相對以往大台劇集嚟講，雖然冇乜深入探討，但係都叫做有少少嘢諗啦！而且後面仲會有例如「跨性別人士案」、「漸凍人安樂死」等等近年有發生嘅事，都算係社會少眾又值得探討嘅方向，之但係究竟大台係決心想洗走陣「師奶味」定係唔覺意做到少少嘢呢？呢個就冇人知喇，不過網民目前就冇乜期望囉。