當年今日

求驗客手記:莫耶斯臨陣確診 槌仔照大勝

蘋果日報 2020/09/24 02:00

莫耶斯韋斯咸武漢肺炎熱刺

「槌仔幫」韋斯咸領隊莫耶斯、兩位球員伊沙迪奧普同祖舒古倫,周二喺球隊主場對英甲侯城嘅英聯盃第三圈賽前確診武漢肺炎,不過球隊喺施巴斯坦賀拿同耶莫蘭高分別梅開二度下,仍然以5:1大炒對手,晉身第四圈。57歲嘅莫耶斯、後衞伊沙迪奧普同中場祖舒古倫,係喺球隊準備對侯城賽前獲通知確診,兩個球員原本都列入咗大軍名單,結果雙雙退隊。
empty
■唔受重用嘅韋舒亞(左)喺英聯盃上陣。
開賽18分鐘,韋斯咸就由辛迪加斯接應耶莫蘭高助攻後先開紀錄,耶莫蘭高再喺45分鐘交出助攻,由施巴斯坦賀拿射入,槌仔幫完半場領先侯城2:0。換邊後,施巴斯坦賀拿博到12碼,耶莫蘭高操刀中鵠,韋斯咸喺56分鐘領前至3:0。侯城喺70分鐘由馬歷韋奇斯追番一球。補時一分鐘,施巴斯坦賀拿接應蘭仙尼傳送後再建一功,韋斯咸將比數拉開至4:1。一分鐘後,耶莫蘭高亦射入個人今場第二球,助槌仔幫以5:1大勝侯城晉級。
另一支英超球隊熱刺原定周二喺英聯盃作客英乙奧連特,熱刺賽前資助對手球員接受病毒檢測,結果確診嘅奧連特球員多達雙位數,賽事被迫取消,據報奧連特將宣佈棄權,熱刺自動晉級。
empty
韋斯咸領隊莫耶斯