吳業坤同陸詩韻今日喺銅鑼灣出席眼鏡店開幕。活動中，詩韻應司儀要求，作狀扮獻吻畀坤哥，事後坤哥表示有啲怕醜，詩韻話：「好驚佢啲fans掟雞蛋。」坤哥即表示：「冇事嘅，我會保護你。」

坤哥透露自己有600度近視同500度散光，適逢今日坤哥戴咗一幅冇鏡片嘅眼鏡，加上又冇戴隱形眼鏡，詩韻笑問坤哥：「係咪覺得我好靚？」坤哥「哄」埋去詩韻度笑住話：「要近啲睇先。」詩韻笑謂：「呢招使得。」

對於李美慧今日出嫁，詩韻則擔任其姊妹團之一，問到兄弟團有冇合眼緣？佢話：「基本上全部都識咗好多年，見番好多舊朋友。」有冇見到舊愛曾文能？佢話：「有見到，佢係兄弟團之一；今朝3點幾起身，5點化妝，仲辛苦過開工，不過係好感動嘅，新郎哥（曾文豪）好好笑。」有冇幫手諗遊戲玩新郎？佢表示：「有，都係尿片、香蕉、花生醬同朱古力，好似糞便咁，新郎哥二話不說就拎嚟食，兄弟們又好合拍，如果做唔到我哋嘅要求就照畀利是，所以都收到好大疊、好厚嘅利是，我未知幾錢，要問番啲姊妹，因為我早走。」好似話收兩億禮金？詩韻笑指：「兩億咩紙幣？都係一個意頭。」其實今日新郎哥曾文豪受訪時都有講番呢封「兩億開門利是」，佢話：「講笑啫！」不過睇番兩位姊妹團成員楊埕同郭千瑜之後騷出嘅一叠$1,000蚊紙幣，都有成吋厚，數目都唔少㗎。

講到另一個姊妹郭千瑜搶花球之餘，仲搶埋利是，詩韻話：「佢喺屋企拎住花球影相，因為我未等到掟花球就要走，冇辦法，冇緣份，下次啦，因為我做咗10幾次姊妹，睇下係咪做夠20次先搶到花球。」

精選娛聞，喺晒《娛果》
http://fb.com/appledailyent