快活谷這晚（21日）尾兩場贏馬檔位迴異，第七場由1檔「摯友無敵」勝出，至於第八場三班一哩則由12檔「奇真」建功，霍利時馬房的「奇真」配田泰安操刀，閘前着啡燈一擊即中，後上鬥贏韋達座騎「牛精叻仔」開齋，單Win及組合獨贏A3分別派105.5及29元。

「奇真」是2013年法國1200米二級賽邁松拉菲特準則大賽冠軍，來港跑到第三季已六歲，今場在港第26次上陣，首度配毛里裘斯騎師田泰安，閘前俾落飛黨睇中，向其獨贏及位置不停灌入注碼。

卒之開跑時，「奇真」獨贏着啡燈而位置着綠燈，排12檔沿途守第7位，在田泰安胯下留到最後百幾米，從後一條氣殺上，及時追過一度走甩的「牛精叻仔」率先衝線贏頸位，「奇真」首度在港贏馬，但馬主團體中人即蕭百君家族無一人現身，只有霍利時及工作人員拉頭馬。

「奇真」連贏搭亞軍「牛精叻仔」着綠燈都有54倍；三、四名分別為潘頓座騎「辣得很」及麥偉利座騎「鋒芒畢露」，四重彩每注派三萬五千幾，騎師王由整晚唯一起孖騎師莫雷拉勝出。

另外，外號火車的見習騎師潘明輝第八場騎「超強快駒」，直路初一打左手鞭，座騎即急劇向內斜跑壓入，令內側幾匹馬一併受干擾，十分礙眼。潘明輝全晚最終拎到三亞一殿，個人第11次在港出賽，首次冇馬贏，長勝神話告終。