黃百鳴同袁潔瑩（Fennie）今日喺上環為世霸潛能嘅分店開幕做剪綵嘉賓。袁潔瑩精神好好，仲透露有人搵佢年底開戲：「好似係大陸同香港合拍嘅，我怕自己唔update，乜都冇問，但係要考慮下先，我都驚自己唔適應。」

袁潔瑩話之前拍《女人俱樂部》唔算戲份多，但都要打醒十二分精神要盡力：「過去自己都算盡力做，滿足咗自己嘅工作，人哋又唔會以我嘅表現，o依家會擔心太耐冇出嚟拍，我嘅節奏人哋未必鍾意。」

不過o依家好多上一代嘅演員都復出，滕麗名近日拍劇被高登仔力捧做視后，大家都好鍾意睇喎，袁潔瑩就話自己鍾意睇舊戲：「o依家睇番都仲識得笑，感人嘅都依然感人，所以我自己係懷念嘅，都想同番以前合作過嘅藝人再合作。」

數到曾經合作過嘅藝人，佢話有李連杰、周潤發、楊紫瓊、鄭裕玲、張學友同吳鎮宇等等，不過好多都只係合作過一次，都想再合作，新人方面，佢就話想同《來自星星的你》嘅都教授：「我鍾意都敏俊（金秀賢），我好耐冇追過劇，但係呢套睇咗好多次，心情唔係咁好嘅時候，睇咗就乜都唔記得晒，加上我又鍾意全智賢呢。」