如果大家有留意今個禮拜一嘅《蘋果投資一周》，就會留意到有一篇叫做《讀者調查》專欄，今個禮拜嘅標題係「靜靜地起革命」，內容大意係投資者入市意欲有上升趨勢，估計後市會「健康發展」。點知後市不單止「健康發展」，直頭係「快高長大」，噚日各大股票行入面嘅經紀同炒家一定亢奮非常。恒指破高位，成交又創新高，相信大家都一定賺到見牙唔見眼。
𠵱家大家最關心個市仲有冇得升，同埋個市幾時見頂。根據利世民嘅經驗，呢種亢奮性牛氣通常都唔會一兩日玩完。其實今次升市，有人話係炒人民幣升值，亦有人話炒港股落後。利世民唔知邊個先係答案，不過淨係知一日大家都唔知因乜原因炒上，一日都仲有得炒。理由好簡單，因為日日升市之後，大家都仲可以憧憬一下仲有的乜嘢可以炒完再炒。𠵱家要搵一個真正嘅利淡因素都難，你話個後市會點發展？

下周一大分析

雖然可能個市有時會大漲小回，不過差唔多每個跌市都係入貨位，要到最保守怕輸嗰班投資者入市，個Party先會宣布結束。所以各位未來要一直訪問身邊啲親朋戚友，如果連平時都唔炒股嗰啲人都心郁郁，就記住唔好累人入市，自已亦都記住隨時掹牌埋單計數。
不過如果大家冇乜機會去訪問其他投資者又點算呢？利世民得悉，蘋果日報《讀者調查》已經有多年歷史，過去亦都每個禮拜一將結果公布，所以就算冇機會訪問朋友，都可以靠呢個讀者調查了解市場脈搏，唔駛吓吓靠估。負責《蘋果投資一周》嘅研究組話，下星期一會大做呢個《讀者調查》分析，大家記住星期一買蘋果啦。
利世民